Тошто Тумбагуш ял шотан илем администраций вуйлатыше Н. Бикташевалан вий-куатым кÿсын налман огыл. Тиде поселенийыште Тукымвож пайрем-влак эре эртаралтыт. Шукерте огыл районысо ветеран-влак каҥашын погынжо пеш пайдалын эртыш. Эше эр шошымак чолга ÿдырамаш мондалтше ожнысо марий йÿлам - вольыкым пуэн кумалмашым угыч тарватыме нерген мутым луктын ыле. Тиде шонымашыжым ял калык полшымо дене шуктен керте.
Жапыштыже кажне тукымын вольыкым Юмылан пуаш шкенжын ойырен налме верже лийын. Кызытсе тукым, чаманен каласаш логалеш, тидым огешат пале. Пайремлан ямдылалташ тÿҥалмек, Минлинмыт тукымын Юмылан пуымо верыштым ойырен налыныт, моторын печылен шынденыт.
Ялсовет вуйлатыше ончылно эше кугу йодыш шогалын - кушто она-еҥым муаш? Вет тиде пашалан вуйын шогышо ожсо кочай-влак шукертак илыш дене чеверласеныт. Шуко шоныде, Наталья Валерьевна Мишканыш йыҥгыртен. Тау район администрацийлан, районысо ÿдырамаш-влак каҥашым вуйлатыше Р. К. Ялаевалан, Ирсай сельский поселений администраций вуйлатыше А. И. Андрияновалан да моло Мишкан родо-влаклан онаеҥым муаш полшымышт-лан. Мÿндыр корным лишыл ыштен толшо карт В. Ш. Шакмаев, мутат уке, йÿла пайремын тÿҥ еҥже лие. Тудын куржтал коштын тыршымыже тысе калыклан кужу жаплан шарнаш кодеш, очыни. Тиде церемонийыш районысо депутат-влак советын секретарьже Р. А. Якупов, район культур пöлкан вуйлыкшо А. И. Габдуллин, район администрацийын информационно-аналитический пöлкам вуйлатышыже Р. Х. Мусин, Шаран телевиденийын пашаеҥже-влак толыныт ыле. Пайрем пошкудо У Тумбагуш, Тошто ден У Кичкиняш ял калыкымат пырля чумырыш. Кумалтышым ямже дене эртараш шорыкым тысе озанлыкын вуйлыкшо Р. Г. Хамитов пуэн. Тыгай уда огыл йÿлам уэш илышыш шыҥдараш тудым кажне ийын эртараш кÿлеш. Вержат сай. Тудым эше кугезына-влакак келыштарен ойырен налыныт. Тыгай ойыш тольо погынышо калык. “Ынде тиде верыш вольыкым лишкат кондыман огыл”, - маньыч пайрем гыч кумыл нöлтын пöртыл кайыше-влак.
А. АСМАЕВ.
Шаран район.
| “Моторын колаш моторын илыман”< Ончычсо | Вес лаштык >Илышын ямжым йÿмаш деч поснат ужын моштыман |
|---|
